Deputetja e Partisë Socialiste, Klodiana Spahiu, ka reaguar pas propozimit për të marrë drejtimin e Ministrisë së Shëndetësisë dhe Mirëqenies Sociale. Në një mesazh të publikuar në rrjetet sociale, Spahiu ka falënderuar kryeministrin Edi Rama për besimin e treguar në këtë detyrë të re.
Në deklaratën e saj, Spahiu është shprehur e gatshme për të vijuar punën dhe për të çuar përpara objektivat dhe angazhimet e qeverisë në sektorin e shëndetësisë. Një pjesë të rëndësishme të reagimit, ajo ia ka dedikuar paraardhëses së saj, Evis Sala, duke vlerësuar punën dhe kontributin e saj gjatë ushtrimit të detyrës në krye të këtij institucioni.
Spahiu ka shprehur mirënjohjen edhe për qytetarët, miqtë dhe të njohurit, të cilët e kanë uruar përmes mesazheve të shumta pas bërjes publike të lajmit. Ajo ka sqaruar se për shkak të numrit të madh të urimeve, nuk ka pasur mundësi t'u përgjigjet individualisht, duke u shprehur: "Faleminderit nga zemra!"