Pas Asamblesë Kombëtare të Partisë Socialiste, kryeministri Edi Rama ka bërë ndryshime në drejtimin politik të qarqeve për të konsoliduar strukturat dhe përmirësuar rezultatet elektorale. Gjatë mbledhjes u evidentuan arritjet dhe sfidat e partisë.
Në gjashtë qarqe u emëruan drejtues të rinj, ndërsa në gjashtë të tjera u ruajtën drejtuesit ekzistues. Ndër ndryshimet e shënuara përmenden emërimi i Enea Karakacit në Shkodër, i Taulant Ballas në Tiranë dhe caktimi i Elisa Spiropalis në Njësinë nr. 13 të kryeqytetit, nga pozicioni i mëparshëm i bashkëdrejtimit politik të Tiranës.
Sekretari përgjithshëm i PS-së, Blendi Klosi, foli për këto lëvizje në një intervistë në Euronews Albania. Ai hodhi poshtë spekulimet për shfuqizimin e Spiropalis dhe theksoi se fokusi i partisë është te rezultatet dhe kontributi i secilit anëtar, jo emrat individualë.
“Kudo PS është aktivizuar. Në Shkodër kemi rritje dhe rezultate pozitive, ndërsa në Pukë kemi humbje. Për këtë arsye kemi vendosur përqendrimin në Shkodër”, deklaroi Klosi. Ai shtoi se ndryshimet nuk reflektojnë performancë negative individuale, por janë strategji për të maksimizuar rezultatet elektorale dhe shërbimin ndaj qytetarëve.
“Nuk ka lajm në lëvizjet e PS. Çdo socialist që kontribuon në strukturat e partisë luan rol kyç në suksesin tonë. Çdo socialist i thjeshtë është kontributor i madh i fitores, sepse kontribuon për Shqipërinë dhe partinë”, përfundoi Klosi.