Zëvendëskryeministrja Albana Koçiu ka reaguar lidhur me tensionet dhe përplasjet e ndodhura sot përpara godinës së Kuvendit. Përmes një njoftimi në rrjetet sociale, ajo dënoi ashpër dhunën verbale dhe fizike të shfaqur ndaj forcave të Policisë.
Sipas Koçiut, këto sjellje agresive nuk i shërbejnë protestës dhe as interesit publik. Ajo u shpreh se ekzistojnë skenarë për destabilizim dhe kaos, të orkestruar nga një grup i vogël individësh, të cilët, sipas saj, vendosin agjendat e tyre politike mbi interesin kombëtar.
Zëvendëskryeministrja theksoi se jeta politike dhe publike e vendit nuk do të mund të merret peng nga tentativa të tilla. Ajo shtoi se qytetarët zgjedhin rrugën e zhvillimit dhe të anëtarësimit në Bashkimin Europian, duke vlerësuar se përpjekjet për destabilizim do të dështojnë, sikurse, sipas saj, kanë dështuar edhe në të kaluarën.