Autoritetet kolumbiane kanë rinisur spërkatjen ajrore të glifosatit për të luftuar korrat e kokës, njoftoi të premten ambasada amerikane në Bogota. Kjo masë synon të zvogëlojë trafikun e drogës, ndërsa SHBA-të e Donald Trumpit ushtrojnë presion mbi Kolumbinë, prodhuesen më të madhe të kokainës në botë.
Prodhimi dhe eksportet e kokainës janë rritur ndjeshëm që kur presidenti Gustavo Petro, socialdemokrat, mori detyrën. Ambasada amerikane deklaroi se "Kolumbia ka filluar zhdukjen e korrave të kokës me dronë", duke e cilësuar si "ndryshim rrënjësor" që sjell më pak kokainë, më shumë siguri në Kolumbi dhe më pak drogë në rrugët amerikane.
Spërkatja ajrore e glifosatit u ndalua në 2015 për rreziqe shëndetësore. Petro, ish-kritik i ashpër si senator opozitar, ka ndryshuar qëndrim. Qeveria e tij njoftoi në dhjetor se do ta rifillonte praktikën, sipas kërkesës së Uashingtonit.
Marrëdhëniet dypalëshe u përmirësuan pas takimit të presidentëve Petro dhe Trump në Uashington në fillim të këtij muaji, pas tensionesh të gjata. Politika e re parashikon që dronët të fluturojnë në lartësi maksimale 1,5 metra mbi bimët dhe të kryejnë spërkatje të kontrolluar për të mbrojtur popullsinë dhe ekosistemet, shpjegoi ministri i Drejtësisë në detyrë Andrés Hidaraga.
Operacioni zhvillohet në zona trafiku droge ku grupet e armatosura detyrojnë fermerët të kultivojnë kokën, bimë gjethet e së cilës shërbejnë si lëndë e parë për kokainën. Banorët kundërshtojnë përdorimin e glifosatit për arsye shëndetësore.