Kombëtarja e futbollit U-21 ka filluar zyrtarisht fazën përgatitore në Tiranë, në kuadër të ndeshjes miqësore që do të zhvillohet kundër përfaqësueses së Ukrainës. Ekipi ka kryer seancën e parë stërvitore në ambientet e “Shtëpisë së Futbollit”, nën urdhrat e trajnerit Alban Bushi dhe stafit të tij teknik.
Federata Shqiptare e Futbollit (FSHF), përmes Departamentit të Komunikimit, njoftoi se lista e lojtarëve të thirrur ka pësuar ndryshime. Mbrojtësi Elton Fikaj nuk do të jetë i disponueshëm për këtë përballje për shkak të një dëmtimi fizik. Për të plotësuar grupin, stafi teknik ka afruar Endrit Asanin, i cili më parë ishte pjesë e ekipit U-19.
Si pasojë e këtij rotacioni, trajneri i Kombëtares U-19, Fatjon Tafaj, ka thirrur për të zëvendësuar pozicionin në ekipin e tij futbollistin e Bylis-it, Petro Markun. Gjithashtu, pjesë e grumbullimit të përfaqësueses U-21 është bërë edhe portieri Simon Simoni.
Ekipi kombëtar do të vazhdojë ciklin stërvitor në kryeqytet deri më datën 3 tetor, kur është planifikuar edhe nisja për në Hungari. Ndeshja ndaj Ukrainës është programuar të luhet më 5 tetor, në stadiumin “Szentmarjay Tibor Városi Stadion” në qytetin e Egerit, duke nisur nga ora 15:30.