Komisioni Europian ka kërkuar qartësi të plotë nga Shtetet e Bashkuara lidhur me masat që ato synojnë të ndërmarrin pas vendimit të fundit të Gjykatës Supreme të SHBA-së. Gjykata hodhi poshtë detyrimet e vendosura, duke argumentuar se Presidenti Donald Trump kishte tejkaluar kompetencat duke i vendosur tarifat pa miratimin e Kongresit.
Në një deklaratë zyrtare të datës 22 shkurt 2026, Komisioni Europian thekson se situata aktuale nuk krijon kushte të favorshme për zbatimin e marrëveshjes së nënshkruar mes palëve. “Situata aktuale nuk është e favorshme për arritjen e tregtisë dhe investimeve transatlantike ‘të drejta, të balancuara dhe reciprokisht të dobishme’, siç është rënë dakord nga të dyja palët dhe siç përcaktohet në Deklaratën e Përbashkët BE–SHBA të gushtit 2025”, thuhet në reagim.
Komisioni nënvizon se do të mbrojë plotësisht interesat e Bashkimit Evropian dhe se kompanitë dhe eksportuesit e BE-së duhet të kenë trajtim të drejtë, parashikueshmëri dhe siguri ligjore. “Një marrëveshje është një marrëveshje. Si partneri më i madh tregtar i Shteteve të Bashkuara, BE-ja pret që SHBA-të të respektojnë angazhimet e marra në Deklaratën e Përbashkët, ashtu siç BE-ja mbetet besnike ndaj angazhimeve të veta”, vijon deklarata.
Komisioni bën të ditur se është në kontakt të vazhdueshëm me administratën amerikane. Të shtunën, më 21 shkurt 2026, Komisioneri Evropian për Tregtinë, Maroš Šefčovič, zhvilloi bisedime me Përfaqësuesin e Tregtisë të SHBA-së, Jamieson Greer, dhe Sekretarin e Tregtisë, Howard Lutnick. “Ne do të vazhdojmë të punojmë për uljen e tarifave doganore, në përputhje me deklaratën e përbashkët”, përfundon reagimi i Komisionit Europian.
Përditësime
Presidenti Trump shpalli tarifa të përkohshme 10% ndaj mallrave evropiane më 20 shkurt dhe i rriti ato në 15% më 21 shkurt, pas vendimit të Gjykatës Supreme.
Detajet përfshijnë tarifa 15% për shumicën e mallrave evropiane, me përjashtime për avionët dhe pjesët e tyre. BE hoqi tarifat e veta dhe tërhoqi kërcënimet hakmarrëse.
Qëndrimi i Komisionit Europian është më i ashpër se reagimi fillestar i së premtes.
Mbetet e paqartë nëse tarifat e reja 15% zëvendësojnë marrëveshjen ekzistuese.