Komisioni Evropian i ka bërë thirrje Kosovës të ratifikojë sa më shpejt marrëveshjen për Planin e Rritjes, sapo të formohet Kuvendi i ri. Kjo deklaratë u bë të hënën nga një zëdhënës i Komisionit për Radion Evropa e Lirë. Ratifikimi është i nevojshëm për të filluar pranimin e miliona euro nga paketa financiare e Bashkimit Evropian për vendet e Ballkanit Perëndimor.
Kosova miratoi agjendën e reformave në vitin 2024, por nuk ka mundur të përfitojë fondet për shkak të mungesës së një Kuvendi funksional që të ratifikojë marrëveshjen formale me bllokun. “Është në interes të Kosovës që ratifikimi të ndodhë sa më shpejt, në mënyrë që të shfrytëzohen plotësisht të gjitha mundësitë që ofron Plani i Rritjes, në dobi të popullatës së saj”, theksoi zëdhënësi.
Kuvendi i ri pritet të formohet në javët në vijim, pas zgjedhjeve të parakohshme parlamentare të 28 dhjetorit, të cilat i fitoi bindshëm Lëvizja Vetëvendosje, partia në pushtet e kryeministrit në detyrë Albin Kurti. Partia e Kurtit siguroi 57 vende në Kuvendin me 120 ulëse dhe pritet të udhëheqë për një mandat të tretë katërvjeçar.
Për ratifikimin e marrëveshjes me Bashkimin Evropian nevojiten 80 vota, çka do të thotë se janë të domosdoshme edhe votat e opozitës. Pa këtë ratifikim, Kosova nuk mund të paraqesë kërkesë për pagesa. Përveç kësaj, Kosova duhet të përmbushë hapat e tjerë brenda afateve të përcaktuara për të pranuar fondet. Ajo ka përgatitur agjendën reformuese bazuar në rekomandimet paraprake.
Plani i Rritjes është një paketë financimi e Bashkimit Evropian për gjashtë vendet e Ballkanit Perëndimor: Kosovën, Shqipërinë, Maqedoninë e Veriut, Malin e Zi, Serbinë dhe Bosnje e Hercegovinën. Qëllimi është përafrimi i ekonomive të këtyre vendeve me standardet evropiane. Nga paketa, 2 miliardë euro janë fonde të pakthyeshme, ndërsa 4 miliardë euro të tjera jepen si kredi të volitshme. Kosovës i takojnë rreth 900 milionë euro, duke e bërë atë përfituesen më të madhe për kokë banori.
Përditësime
Komisioni Evropian ka specifikuar afatet për zbatimin e hapave në marrëveshjen për Planin e Rritjes me Kosovën. Hapat e planifikuar për dhjetor 2024 duhet të përmbushen brenda dy vjetësh. Hapat e planifikuar për qershor 2025 dhe më pas duhet të përmbushen brenda një viti. Nëse një hap nuk realizohet deri në fund të periudhës së faljes, partneri përfitues humb fondet e alokuara për atë hap.