Komisioni i posaçëm për Reformën Territoriale mblidhet të hënën në orën 13:00, por Partia Demokratike nuk do të marrë pjesë. Partia Socialiste e ka thirrur mbledhjen si afat të fundit për opozitën, por kryetari i PD-së, Sali Berisha, përsëriti se deputetët demokratë nuk do të shkojnë, duke theksuar mungesën e bashkëpunimit me mazhorancën.
Partia Socialiste ka vendosur të vazhdojë e vetme me reformimin e njësive vendore. Në rendin e ditës të parlamentit për të martën, që u publikua sot, është parashikuar ndryshimi i përbërjes së komisionit. Komisioni është ndërtuar mbi parimin e barazisë së anëtarëve mes mazhorancës dhe opozitës, por bojkoti i PD-së e ka bërë të pamundur zhvillimin e mbledhjeve.
Socialistët propozojnë që mazhoranca të ketë një anëtar më shumë dhe PD-ja të humbasë bashkëkryetarin. Kjo rrugë ngjan me atë të vitit 2014, kur pas bojkotit të demokratëve, mazhoranca ndryshoi përbërjen duke hequr veton e opozitës. Edhe atëherë dhe sot, PS me aleatët ka më shumë se 84 vota në parlament, numri i nevojshëm për ndryshimin territorial.
Mazhoranca synon miratimin e reformës deri në korrik, për aplikim në zgjedhjet lokale të pranverës së vitit të ardhshëm. PD ndërpreu bashkëpunimin pas votimit të Endri Shabanit si Avokat i Popullit, të cilin e pa si provë mungese dialogu nga Kryeministri Edi Rama. Gjithashtu, akuzat e SPAK-ut ndaj Belinda Balluku, numrit dy të qeverisë, për tenderat në AKSH, kanë radikalizuar pozicionin e opozitës.
Përditësime
Komisioni për Reformën Territoriale ka 17 anëtarë: 9 nga PS, 6 nga PD, 1 nga Aleanca për Ndryshim dhe 1 nga Partia e Lirisë. Kryetari është nga PS, zëvendëskryetari përfaqëson PD.
Grupi parlamentar i PD mblidhet në orën 13:00, njëkohësisht me komisionin, për të diskutuar qëndrimin për seancën e martës.
PD ka ndryshuar qëndrim dhe ka vendosur të marrë pjesë në Komisionin për Reformën Territoriale pas mbledhjes së grupit parlamentar.
Deputetë si Oerd Bylykbashi, Eno Bozdo, Bledion Nallbati, Xhelal Mziu, Ina Zhupa dhe Besart Xhaferri argumentuan kundër bojkotit.
Demokratët synojnë të zhbërnë reformën e 2014-ës nga pozicioni në komision.
Sali Berisha fokusohet fillimisht te protestat kundër Edi Ramës dhe thekson se Këshilli i Mandateve dhe Imunitetit mbetet komisioni më i rëndësishëm.