Komiteti Ekzekutiv i Federatës Shqiptare të Futbollit (FSHF) zhvilloi mbledhjen e radhës këtë të hënë, në fokus të së cilës ishin vendimmarrje për zhvillimin e futbollit shqiptar.
Një nga vendimet kryesore ishte emërimi i drejtorit teknik të ri. Komiteti miratoi me votë unanime emërimin e Abdyl Kuriut në këtë pozicion kyç për drejtimin strategjik dhe zhvillimin afatgjatë të futbollit.
Abdyl Kuriu, ish-anëtar i Komitetit Ekzekutiv për 16 vite në katër mandate, sjell përvojë të gjerë në fushën e futbollit, si dhe kontribute akademike e institucionale. Ai u tërhoq nga zgjedhjet e 16 shkurtit për anëtar të Komitetit Ekzekutiv. Njohja e thellë e strukturave të federatës e bën atë profil të përshtatshëm për të adresuar sfidat dhe për të zhvilluar projektet.
Kuriu pason italianin Fulvio Pea, i cili zyrtarizoi largimin më 9 prill pas tre vitesh në detyrë.