Radio Evropa e Lirë (REL) raporton se një kompania serbe, e sanksionuar nga Shtetet e Bashkuara dy vjet më parë për eksportimin e mallrave të sanksionuara në Rusi, vazhdon veprimtarinë nën emër të ri.
Kompania TR Industries tani operon si Onderon Systems. Të dhënat doganore tregojnë se eksportet nuk u ndalën pas sanksioneve perëndimore. Në vitin 2024, Onderon Systems dërgoi mallra me vlerë gati 750 mijë euro në Rusi dhe rreth 500 mijë euro në Indi. Nuk ka të dhëna për llojin e mallrave ose marrësit specifikë, ndërsa kompania nuk i është përgjigjur pyetjeve të REL-it.
Që nga fillimi i pushtimit rus të Ukrainës, Bashkimi Evropian, Shtetet e Bashkuara dhe Mbretëria e Bashkuar kanë vendosur sanksione dhe kontroll eksporti për të penguar financimin e luftës nga Kremlini. 11 kompani serbe janë në listën e zezë të SHBA-së, të akuzuara për lehtësimin e eksportit të produkteve si pajisje elektronike, të përdorshme në industrinë ushtarake. Këto kompani kanë fituar miliona euro nga kjo veprimtari.
Autoritetet në Beograd refuzojnë të zbatojnë sanksionet perëndimore kundër Rusias dhe lejojnë aktivitetin e këtyre kompanive, pasi nuk ekzistojnë pengesa ligjore në Serbi. REL-i analizoi raportet financiare, regjistrat bankarë dhe baza të dhënash publike. Pas sanksioneve, gjashtë kompani u zhytën në borxhe dhe tre prej tyre po mbyllen. Sanksionet ndikojnë shpejt duke përjashtuar kompanitë nga sistemi global, bllokuar llogaritë dhe penguar pagesat.