Trajneri i Bayern-it të Mynihut, Vincent Kompany, foli në konferencë për shtyp para ndeshjes në shtëpi ndaj Hoffenheim-it në Bundesligë.
Tekniku belg nënvizoi se suksesi i ekipit nuk varet vetëm nga golat e shënuar, por edhe nga stabiliteti në mbrojtje. “Goli fiton ndeshje, por mbrojtja ndërton suksesin e Bayern-it”, tha ai. Kompany shtoi se sfida e tij është të kontrollojë gjithçka: “Të shënosh shumë gola është e rëndësishme, por po aq e rëndësishme është të pësosh sa më pak”.
Edhe pse Bayern-i ka pësuar disa gola kohët e fundit, trajneri mbetet i bindur për forcën e repartit defensiv. “Ne vijojmë të jemi mbrojtja më e mirë e Gjermanisë”, deklaroi Kompany. Ai kërkon një ekuilibër mes sulmit dhe mbrojtjes, duke analizuar çdo situatë në kontekst.
“Duhet të analizojmë gjithçka: numrin e madh të ndeshjeve apo aspektet strukturore të lojës. Mundohemi t’i adresojmë gjërat në mënyrë proaktive”, shpjegoi ai. Bayern-i ka shënuar 74 gola këtë sezon, një tregues i fuqisë sulmuese, por Kompany paralajmëroi se mbrojtja nuk duhet neglizhuar.
“Edhe kundërshtarët shënojnë, kjo është normale. E rëndësishme është që gjithçka të mbetet brenda kufijve të pranueshëm. Futbolli nuk është bardhezi”, përfundoi trajneri belg.
Përditësime
Hoffenheim ka në skuadër lojtarët shqiptarë Leon Avdullahu, Albian Hajdari dhe Fisnik Asllani.