Presidenti amerikan Trump i bëri sërish thirrje udhëheqjes në Teheran për të pranuar kërkesat e SHBA-së, duke përmendur një afat nga 10 deri në 15 ditësh, përndryshe "do të ndodhin gjëra të këqija". Kjo deklaratë erdhi më 21 shkurt 2026, në mes të negociatave mes SHBA-së dhe Iranit, ndërsa shqetësimi për një luftë të mundshme rritet.
Për shkak të frikës nga një sulm i mundshëm amerikan ndaj Iranit, shtetet evropiane po marrin masa sigurie për personelin e tyre ushtarak në Lindjen e Mesme.
Gjermania redukton personelin e Bundeswehr-it
Një zëdhënës i Ministrisë gjermane të Mbrojtjes sqaroi se Bundeswehri ka reduktuar më tej praninë në Erbil të Irakut. Në koordinim me partnerët, misioni është zvogëluar vazhdueshëm gjatë javëve të fundit. Aktualisht në terren mbetet vetëm "personeli absolutisht i domosdoshëm", ndërsa pjesa tjetër është kthyer në Gjermani përmes Jordanisë.
Norvegjia tërheq ushtarët
Pas Gjermanisë, edhe Norvegjia ka kthyer në atdhe disa nga rreth 60 ushtarët e saj në rajon. Kjo masë u mor për shkak të situatës së sigurisë, sipas një zëdhënësi të forcave të armatosura norvegjeze.
Thirrje për largim nga Irani
Ministria e Jashtme gjermane u bëri "shprehimisht" thirrje shtetasve gjermanë të largohen nga Irani. Ende ekzistojnë fluturime komerciale për dalje nga vendi, si dhe mundësi për rrugë tokësore. Sipas listës për parandalimin e krizave, në Iran ndodhen ende disa qindra shtetas gjermanë. Ambasada gjermane në Teheran punon me kapacitet të kufizuar personeli dhe ofron vetëm ndihmë konsullore të kufizuar.