Ministri në detyrë i Punëve të Jashtme dhe Diasporës, Glauk Konjufca, ka zhvilluar një vizitë në Washington D.C., ku mori pjesë në takimin ministror kushtuar rritjes së rrezikut nga terrorizmi politik, të organizuar nga Sekretari amerikan i Shtetit, Marco Rubio.
Sipas Konjufcës, pjesëmarrja e Kosovës në këtë ministerial është e një rëndësie të veçantë, pasi i mundëson shtetit të kontribuojë në forcimin e mekanizmave mbrojtës dhe në parandalimin e kërcënimeve globale. Ai vlerësoi se terrorizmi politik po shfaqet në forma gjithnjë e më të organizuara, duke tejkaluar kufijtë shtetërorë.
Në deklaratat e tij, ministri në detyrë theksoi se kjo dukuri po shfrytëzon rrjetet ndërkombëtare, burimet financiare dhe hapësirën digjitale për të vënë në rrezik stabilitetin e institucioneve demokratike. Ai ripohoi se bashkëpunimi me SHBA-në dhe shtetet e tjera partnere është thelbësor për ndërtimin e një mjedisi më të sigurt për mbrojtjen e vlerave të përbashkëta.
Konjufca konfirmoi se Kosova do të vazhdojë të jetë e përkushtuar ndaj nismave ndërkombëtare që synojnë ruajtjen e paqes dhe sigurisë globale.