Glauk Konjufca, ministër i Jashtëm i Kosovës, në mbledhjen e Këshillit të Sigurimit të Organizatës së Kombeve të Bashkuara, i ka bërë thirrje Serbisë të pranojë realitetin dhe të njohë Kosovën si shtet të pavarur e sovran.
Ai deklaroi se Kosova mbetet e gatshme të normalizojë marrëdhëniet ndërshtetërore dhe fqinjësore, por pengesa kryesore për paqen dhe normalizimin është Serbia.
Sipas Konjufcës, Serbia nuk është e interesuar as të normalizojë marrëdhëniet me Kosovën, as të hyjë në BE.
Ministri i Jashtëm tha se veprimet e Serbisë mbajnë peng të gjithë rajonin nën një hegjemoni.
Ai akuzoi Beogradin se ka vazhduar rolin destruktiv duke u përpjekur të ndërhyjë në zgjedhjet e Kosovës dhe duke mbështetur Listën Serbe për të reflektuar drejtimin e vet përmes një partie në pushtet.
Konjufca shtoi se Kosova ka penguar këto ndërhyrje të huaja dhe ka ruajtur dinjitetin e institucioneve të saj demokratike.
Ai theksoi se, pavarësisht sfidave, Kosova do të vazhdojë të mbrojë rendin demokratik dhe sovranitetin e saj.