Ministri i Punëve të Jashtme dhe Diasporës, Glauk Konjufca, foli sërish për kandidaturën e tij për postin e presidentit të Kosovës. Gjatë një komunikimi për mediat, ai deklaroi se tërhiqet nga kjo kandidaturë nëse partitë politike propozojnë një emër jopartiak.
Konjufca theksoi kornizën e vendosur nga kryeministri për një president konsensual. Ky president nuk duhet të jetë drejtpërdrejt nga partitë politike, pra jo nga kryesitë, nënkryetarët apo strukturat e tyre. "Për shembull, të mos jetë nënkryetari i tyre apo kështu shumë i afërt, që vjen prej rangjeve, strukturave të partive", u shpreh ai.
Sa i përket variantit të një presidenti partiak, Konjufca vuri në dukje se kjo mund të ndodhë vetëm me marrëveshje politike. Deri tani, diskutimet kanë qenë për një president jopartiak. "Nëse është jopartiak, unë jap dorëheqje prej kandidaturës sime. Jap dorëheqje sepse po gjendet një i të gjithëve, kush jam unë me mbyllë rrugë", deklaroi ai.
Në takimet me opozitën nuk janë biseduar emra konkretë kandidatësh. Lëvizja Vetëvendosje ka propozuar Konjufcën, por ai përmendi se një propozim i tillë ishte parashikuar edhe për kryeparlamentar. Ai theksoi rëndësinë e dhënies së një presidenti të Kosovës dhe nevojën që të gjitha subjektet politike të ulen për të gjetur një person të përshtatshëm jopartiak, jo patjetër dikë që nuk ka marrë pjesë kurrë në politikë.