Mediumi izraelit i24 news raporton se Izraeli ka konfirmuar se Kosova dhe Kazakistani do t’i bashkohen Marokut, Indonezisë, Greqisë dhe Shqipërisë në Forcën Ndërkombëtare të Stabilizimit (ISF) në Gaza. Kjo forcë synon zbatimin e armëpushimit dhe çarmatösjen e Hamasit.
Forca shumëkombëshe pritet të bëhet operacional deri në maj, sipas raportimit të mediumit.
Autoritetet e Kosovës nuk kanë dhënë akoma ndonjë detaj për pjesëmarrjen në Gaza.
Ditë më parë, kryeministri Albin Kurti foli për këtë çështje kur u pyet për Bordin e Paqes. Ai theksoi:
“Kemi filluar së pari me pjesëmarrjen tonë në Forcën Ndërkombëtare Stabilizuese për Gaza dhe aty unë e di që Kosova është përfaqësuar në konferencën në Doha në Katar nga Bashkim Jashari. Kemi shprehur gatishmërinë tonë që të marrim pjesë këtu ku FSK është e mirënjohur për kërkim-shpëtim dhe deminim dhe jo vetëm. Ne kemi qenë të interesuar që të marrim pjesë në organet vendimmarrëse politike për këtë forcë. Procesi do të ecë më tutje.”