Ministria e Digjitalizimit dhe Administratës Publike e Kosovës dhe Ministria e Administratës Publike e Malit të Zi kanë zyrtarizuar marrëveshjen për njohjen e ndërsjellë të shërbimeve të besuara dhe skemave të identifikimit elektronik. Ceremonia e nënshkrimit u zhvillua në objektin e ish-Rilindjes në Prishtinë.
Gjatë fjalës së tij, ministri Lulëzon Jagxhiu theksoi se ky hap është pjesë e reformave në fushën e transformimit digjital. Ai bëri të ditur se platforma e-Kosova aktualisht ofron mbi 320 shërbime elektronike, ndërsa shtoi se qeveria po punon për tranzicionin drejt teknologjive Cloud dhe lansimin e kuletës digjitale (Digital Wallet).
Nga ana tjetër, ministri malazez Marash Dukaj vlerësoi se ky bashkëpunim është thelbësor për qytetarët dhe bizneset që operojnë në të dyja shtetet. Dukaj deklaroi se synimi i Malit të Zi është që, deri në fund të tetorit, të ketë nënshkruar marrëveshje të ngjashme me të gjitha shtetet e Ballkanit Perëndimor, duke e konsideruar këtë si një përparim të rëndësishëm në agjendën e integrimit evropian.