Kombëtarja kosovare e hendbollit femrash u mposht 27:29 nga Finlandës në ndeshjen e luajtur të dielën mbrëma në Pallatin e Rinisë në Prishtinë. Ndeshja i takoi xhirove të katërt të fazës së dytë kualifikuese për Euro 2026 në Grupin 1, ku garojnë edhe Franca dhe Kroacia.
Kosova kishte nevojë për fitore me të paktën tre gola dallim për ta kaluar Finlandën në tabelë, por pësoi humbjen e dytë radhazi pas asaj 21:23 në Vantaa të enjten. Me këtë rezultat, Kosova mbetet në vendin e fundit pa pikë, ndërsa Finlanda zë vendin e tretë me 4 pikë.
Ndeshja filloi me epërsi të Finlandës (4:1), por Kosova barazoi në 7:7 pas aktivizimit të Mirela Gjikokajt dhe krijoi avantazh 15:9. Pjesa e parë u mbyll 15:12 për Kosovën. Në pjesën e dytë, Finlanda përmbysi rezultatin në minutën e 43-të, barazoi 27:27 në minutën e 59-të dhe shënoi dy gola të tjerë për fitoren.
Te Kosova dalluan portierja Aurora Kryeziu me 14 pritje, Mirela Gjikokaj me 9 gola nga 16 tentime, Elisa Mulaj dhe Merlinda Qorraj me nga 5 gola, si dhe Tina Hetemi me 4 gola. Te Finlanda, Ellen Voutilainen shënoi 7 gola, ndërsa Emma Aarnio 5 gola.
Në ndeshjen tjetër të grupit, Franca fitoi 34:14 ndaj Kroacisë. Kosova do të luajë dy ndeshje të tjera në prill ndaj Francës dhe Kroacisë.