Kombëtarja e Kosovës do të zhvillojë sonte ndeshjen miqësore kundër Andorrës. Takimi do të luhet në stadiumin Fadil Vokrri në Prishtinë, me fillim nga ora 20:00.
Futbollistët e kombëtares kanë përfunduar të shtunën seancën e fundit stërvitore. Përzgjedhësi Franco Foda, së bashku me stafin e tij, ka punuar në detajet e fundit taktike dhe në organizimin e lojës, me fokus në zbatimin sa më të mirë të detyrave në fushë. Atmosfera në radhët e ekipit raportohet të jetë pozitive, ndërsa "Dardanët" janë shprehur të gatshëm për sfidën para tifozëve vendas.
Kjo përballje vjen pas miqësores që Kosova zhvilloi ditë më parë në Pragë ndaj Çekisë, ku u mposht me rezultatin 2-1.
Përditësime
Nën drejtimin e trajnerit Franco Foda, Kosova do të përballet sonte me Andorrën në stadiumin Fadil Vokrri. Kjo ndeshje shërben si test final para nisjes së Ligës së Kombeve në shtator, ku stafi teknik do të vlerësojë variantet taktike dhe formën e lojtarëve. Foda ka kërkuar intensitet maksimal dhe përqendrim të plotë, duke paralajmëruar grupin të mos e nënvlerësojë kundërshtarin.