Gati tri vjet pasi fitoi të drejtën për organizimin e Lojërave Mesdhetare 2030, Kosova ende nuk ka filluar punët kryesore në infrastrukturën sportive. Këto lojëra, që zhvillohen çdo katër vjet dhe konsiderohen ngjarja më e rëndësishme sportive pas Lojërave Olimpike, do të mbahen për herë të parë në vend nga 24 korriku deri më 4 gusht 2030.
Shqipëria është zotuar të ndihmojë duke ofruar bregdetin për garat e lundrimit. Megjithatë, punët për objektet kryesore nuk kanë nisur: stadiumi kombëtar, ku do të zhvillohen ceremonitë e hapjes dhe mbylljes, si dhe fshati mesdhetar për akomodimin e rreth 5.000 atletëve nga rreth 26 vende pjesëmarrëse.
Infrastruktura sportive duhet të jetë gati deri në vitin 2028, para testimeve dhe pranimit nga federatat ndërkombëtare. Qeveria e Kosovës ka parashikuar 250 milionë euro në një projektligj, që pret miratim në Kuvend.
Përgjegjës për organizimin janë Ministria e Sportit dhe Rinisë, komuna e Prishtinës dhe Komiteti Olimpik i Kosovës (KOK). Zëdhënësi i KOK-ut, Kushtrim Krasniqi, deklaroi për Radion Evropa e Lirë se “sigurisht se jemi prapa me infrastrukturën dhe çdo ditë që kalon është në disfavorin tonë”.
Ndërtimi i stadionit kombëtar është diskutim i vjetër në vend, por ende nuk është ndarë as toka e as paratë për të, pavarësisht nevojës së tanishme.