Përfaqësuesja U17 e Kosovës humbi ndeshjen e parë të Grupit B7 të Ligës B për kualifikimet e Kampionatit Evropian U17, që zhvillohet në Estoni. Duelin e zhvilluar të mërkurën në Antalya të Turqisë, Kosova e humbi me rezultatin 1:0 ndaj Holandës.
Goli i vetëm u shënua nga sulmuesi Donny van der Lijcke në minutën e 4-t të kohës shtesë. Më parë, në minutën 28, portieri Erlis Shala priti penalltinë e këtij lojtari holandez.
Trajneri i Kosovës U17, Arbnor Morina, komentoi ndeshjen: “Është mëkat i madh që djemtë tanë nuk e kurorëzuan këtë lojë jo vetëm me barazim, por edhe me fitore. Ata treguan lojë shumë të mirë, teksa rastet kanë qenë të barabarta në të dyja anët. Fatkeqësisht, ndeshja u vendos në minutat e fundit të kohës shtesë, kur ra koncentrimi i ekipit. Mirëpo, duhet t’i përgëzoj djemtë për disiplinën tekniko-taktike dhe për fytyrën e vërtetë që treguan në fushë. Këta lojtarë, së bashku me disa të tjerë jashtë listës së këtij grumbullimi, duhet të llogariten seriozisht për të ardhmen”.
Ndeshja e radhës për Kosovën është më 28 mars ndaj Bjellorusisë. Vetëm fituesi i grupit avancon në Ligën A, ndërsa nga Liga B nuk ka kualifikim direkt në Evropian.