Përfaqësuesja e Kosovës U21 ka barazuar pa gola, 0-0, në miqësoren e zhvilluar ndaj Luksemburgut U21. Takimi u zhvillua pasditen e së shtunës në ambientet e Kampit Nacional të FFK-së në Hajvali.
Kjo përballje shërbeu si testi i dytë për futbollistët e drejtuar nga trajneri Hekuran Kryeziu brenda pak ditësh. Të mërkurën, "Dardanët" e rinj u mposhtën me rezultat minimal 1-0 nga Turqia U21.
Stafi teknik i ka shfrytëzuar këto dy ndeshje për të vlerësuar formën e lojtarëve, për të konsoliduar grupin dhe për të dhënë minuta për lojtarët në prag të angazhimeve zyrtare. Këto testime janë pjesë e përgatitjeve për tri ndeshjet e fundit kualifikuese të Kampionatit Evropian, të cilat do të zhvillohen gjatë vjeshtës.
Ndonëse gjasat për kualifikim mbeten të vogla, synimi i stafit teknik është që ekipi të paraqitet sa më mirë në ndeshjet e mbetura dhe ta mbyllë ciklin kualifikues me rezultate pozitive.