Procesi i votimit për zgjedhjet e parakohshme parlamentare në Kosovë ka filluar mëngjesin e sotëm në të gjithë territorin e vendit. Zëdhënësi i Komisionit Qendror të Zgjedhjeve (KQZ), Valmir Elezi, njoftoi se materiali zgjedhor është shpërndarë me kohë dhe se të gjitha qendrat e votimit janë funksionale. Procesi po zhvillohet në 949 qendra votimi me gjithsej 2,550 vendvotime, prej të cilave 911 qendra janë për votim të rregullt dhe 38 qendra janë dedikuar për votimin me kusht.
Për mbarëvajtjen e procesit, KQZ ka vënë në funksion dhomën operative, e cila bashkëpunon ngushtë me Policinë e Kosovës dhe Prokurorinë e Shtetit. Mbi 100 prokurorë janë angazhuar për të trajtuar çdo parregullsi të mundshme. Përveç votuesve brenda vendit, të cilët numërojnë 1,959,962 votues, procesi përfshin edhe votimin jashtë Kosovës, ku janë regjistruar 132,212 shtetas.
Kjo është gara e tretë parlamentare brenda një periudhe të shkurtër, e cila vjen pas dështimit për zgjedhjen e presidentit. Në garë marrin pjesë 21 subjekte politike (17 parti, 3 koalicione dhe 1 kandidat i pavarur) me gjithsej 902 kandidatë, prej të cilëve 593 burra dhe 309 gra.
KQZ ka theksuar se votimi me asistencë lejohet vetëm për kategoritë e specifikuara, siç janë personat me aftësi të kufizuara ose votuesit e verbër që nuk dinë të përdorin alfabetin Braille. Qytetarët mund të verifikojnë qendrën e tyre të votimit përmes platformës elektronike zyrtare të KQZ-së.