Procesi i rinumërimit të votave në Qendrën e Numërimit dhe Rezultateve (QNR) po shkon drejt përmbylljes së plotë. Sipas zëdhënësit të Komisionit Qendror të Zgjedhjeve (KQZ), Valmir Elezi, deri në përfundim të ditës së enjte janë rinumëruar 176 vendvotime nga 185 të përcaktuara për këtë proces.
Nëntë vendvotimet e mbetura janë planifikuar të përpunohen gjatë paradites së sotme, më 19 qershor 2026, me çka do të përmbyllet i gjithë procesi. Ky rinumërim, i cili përbën 7.41% të totalit prej 2,498 vendvotimeve të rregullta, është ndërmarrë si masë kontrolli për të garantuar saktësinë e procesit të votimit pas parregullsive të evidentuara në Qendrat Komunale të Numërimit.
Shpallja e rezultateve përfundimtare
Pas përfundimit të rinumërimit, KQZ shprehet teknikisht e gatshme për shpalljen e rezultateve përfundimtare të zgjedhjeve të 7 qershorit 2026. Megjithatë, institucioni duhet të presë përfundimin e afateve për ankesa nga subjektet politike drejtuar PZAP-it ose Gjykatës Supreme.
"Nëse nuk do të ketë ankesa, atëherë KQZ mund të procedojë me shpalljen e rezultateve. Por, nëse do të ketë të tilla, atëherë do të presim vendimmarrjen e institucioneve përkatëse", deklaroi zëdhënësi Elezi.