Komisioni Qendror i Zgjedhjeve (KQZ) zhvillon sot mbledhjen e radhës, ku pika kryesore e rendit të ditës është shpallja e rezultateve përfundimtare të zgjedhjeve të parakohshme për Kuvendin e Republikës së Kosovës, të mbajtura më 7 qershor. Mbledhja është planifikuar të nisë në orën 11:00.
Hapja e rrugës për shpalljen e këtyre rezultateve erdhi pasi Gjykata Supreme hodhi poshtë ankesat e kandidatëve të Partisë Demokratike të Kosovës (PDK), Bekim Haxhiu dhe Qëndrim Kryeziu, të cilët kërkonin rinumërimin e plotë të votave për subjektin e tyre politik.
Bazuar në rezultatet preliminare dhe të dhënat e procesuara në platformën e KQZ-së, shpërndarja e mandateve për legjislaturën e re pritet të jetë si vijon:
• Lëvizja Vetëvendosje: 53 deputetë (47.13% të votave)
• Partia Demokratike e Kosovës (PDK): 22 deputetë (19.44% të votave)
• Lidhja Demokratike e Kosovës (LDK): 18 deputetë (16.69% të votave)
• Aleanca për Ardhmërinë e Kosovës (AAK): 7 deputetë (6.74% të votave)
Pas shpalljes zyrtare të rezultateve nga KQZ-ja, do të fillojnë procedurat ligjore për certifikimin e tyre. Ky hap shënon përmbylljen e procesit zgjedhor dhe krijon premisat për fillimin e bisedimeve mes subjekteve politike për formimin e institucioneve të reja të vendit.
Përditësime
Komisioni Qendror i Zgjedhjeve (KQZ) ka shpallur rezultatet përfundimtare të zgjedhjeve. Nga subjektet e komuniteteve joshumicë, Lista Serbe ka fituar 9 ulëse, ndërsa KDTP ka siguruar 2 ulëse. Palët e pakënaqura kanë afat prej 48 orësh për të ushtruar ankesë pranë Panelit Zgjedhor për Ankesa dhe Parashtresa (PZAP).