Procesi i vlerësimit të pakove me fletëvotime nga votimi jashtë Kosovës, i cili nisi më 9 qershor 2026, po vijon në Qendrën e Numërimit dhe Rezultateve (QNR). Zëdhënësi i KQZ-së, Valmir Elezi, njoftoi se deri të mërkurën, më 10 qershor, në orën 10:00, janë shqyrtuar mbi 7 mijë pako.
Nga ky shqyrtim, 7,153 pako janë aprovuar, ndërsa 142 janë refuzuar. Arsyeja kryesore e refuzimit është mungesa e dëftesës së regjistrimit, një dokument me të dhëna unike që u dërgohet votuesve të regjistruar. Vetëm për këtë arsye janë refuzuar 114 pako.
Procesi i tërheqjes së pakove nga 23 kuti postare, të shpërndara në 22 shtete dhe në Kosovë, u përmbyll më 8 qershor. Gjithsej janë tërhequr mbi 85,700 pako të supozuara me fletëvotime, një pjesë e të cilave tashmë është transportuar në Kosovë për verifikim.
Sipas të dhënave zyrtare, gjatë periudhës nga 6 deri më 17 maj 2026, për të votuar përmes postës ishin regjistruar 104,480 shtetas. Pas përfundimit të vlerësimit të të gjitha pakove, KQZ do të publikojë numrin përfundimtar të atyre që do t'i nënshtrohen numërimit.
Përditësime
Komisioni Qendror i Zgjedhjeve (KQZ) ka përfunduar numërimin dhe verifikimin në 13 Qendra Komunale të Numërimit (QKN). Deri më tani janë përpunuar 1,379 nga 2,498 vendvotime, duke shënuar 55% të progresit. Në kuadër të vlerësimit të mbi 85,000 pakove nga diaspora, qendrat me përqendrimin më të lartë janë:
- Berlini: 41,561 pako;
- Berna: 23,356 pako.
Stafi i KQZ-së po aplikon skanimin digjital të listës votuese për të parandaluar votimin e dyfishtë.
Deri më 10 qershor, Komisioni Qendror i Zgjedhjeve (KQZ) ka vlerësuar mbi 23.300 pako me vota nga diaspora. Nga ky proces, janë aprovuar 22.601 pako, ndërsa janë refuzuar 755 të tilla, ku 699 prej tyre janë kthyer për shkak të mungesës së dëftesës së regjistrimit.