Mesfushori i Kombëtares shqiptare Kristjan Asllani u prezantua më 31 janar 2026 si lojtar i Besiktashit turk. Ai kaloi në formë huazimi deri në fund të sezonit aktual, me klubin që mban opsionin për blerjen përfundimtare të kartonit të tij.
Në videon e publikuar nga klubi në rrjete sociale, Asllani foli në italisht dhe theksoi lidhjen mes identitetit të tij shqiptar dhe shqiponjës, simbol i flamurit shqiptar dhe nofka e Besiktashit ("Shqiponjat" ose "Kartal" në turqisht). Deklarata e tij ishte:
“Kam lindur shqiponjë dhe është në gjakun tim. Një shqiponjë nuk tërhiqet kurrë mbrapa dhe unë do e tregoj. I lindur për të fluturuar dhe i krijuar për të luftuar. Asnjë frikë, asnjë justifikim. Vetëm zemër. Përqendrim maksimal. I lindur shqiponjë, gjithmonë shqiponjë.”
23-vjeçari kishte luajtur së fundi te Interi, ku humbi hapësirën e dëshiruar, dhe më parë u huazua te Torino, por as atje nuk arriti të fitojë minuta të mjaftueshme.
Tani, nën drejtimin e trajnerit Sergen Yalçın, Asllani pret të shkëlqejë te Besiktashi, skuadra turke që synon kualifikimin në garat evropiane këtë sezon.