Rajoni i Irkutskut në Siberinë Lindore po përballet me një mungesë të theksuar të furnizimit me karburant, duke detyruar autoritetet vendore të kërkojnë masa kufizuese nga qytetarët. Pavel Berezovsky, kreu i distriktit Nizhneilimsky, u ka kërkuar banorëve që të kufizojnë lëvizjet me automjete private dhe t'i përdorin ato vetëm në raste urgjente.
Kjo thirrje vjen si pasojë e përpjekjeve për të administruar rezervat e kufizuara të benzinës, të cilat rrezikojnë të shterojnë në ditët në vijim. Berezovsky e ka cilësuar situatën si shumë serioze, duke nënvizuar se mungesa e karburantit ka filluar të ndikojë në transportin lokal dhe ofrimin e shërbimeve bazë. Duke u bërë thirrje qytetarëve për mirëkuptim, ai theksoi se duhet të jenë të përgatitur për mundësinë e një mungese edhe më të madhe në vijim.
"Imagjinoni një javë të tërë pa benzinë askund në qytet. Atëherë do ta kuptojmë vërtet sa serioze është situata", deklaroi Berezovsky. Ende nuk është bërë e ditur se kur pritet të normalizohet furnizimi me karburant në këtë rajon të Rusisë.