Kroacia ka siguruar kualifikimin në fazën e 1/16 së finales së Kupës së Botës 2026, pasi mposhti Ganën me rezultatin 2-1 në ndeshjen e fundit të fazës së grupeve. Skuadra kroate e mbylli Grupin L në vendin e dytë me gjithsej 6 pikë.
Ndeshja nisi me dominim të kroatëve, të cilët rrezikuan që në minutën e 17-të me Nikola Vlašić, goditja e të cilit u ndal nga shtylla. Zhbllokimi i rezultatit erdhi në minutën e 31-të, kur mesfushori Petar Sučić realizoi një gol nga distanca, duke mposhtur portierin ganez Benjamin Asare.
Në pjesën e dytë, Gana reagoi duke shtuar presionin. Në minutën e 73-të, pas një goditjeje dënimi të ekzekutuar nga Ernest Nuamah, lojtari Derrick Luckassen barazoi shifrat në 1-1. Goli u verifikua nga sistemi VAR për dyshime mbi pozicionin jashtë loje, por u konfirmua si i rregullt.
Fitorja e Kroacisë u vulos në minutën e 83-të. Pas një harkimi nga goditja e këndit nga Luka Modrić, Nikola Vlašić realizoi me kokë. Topi u përplas në shtyllë përpara se të përfundonte në rrjetë për rezultatin përfundimtar 2-1. Pas këtij rezultati, Anglia e mbyll grupin si kryesuese, ndërsa Gana vazhdon garën si një ndër ekipet e renditura në vendin e tretë.