Albin Kurti, kryeministër i Republikës së Kosovës, mirëpriti më 27 shkurt 2026 kryetaren e Akademisë së Shkencave dhe Arteve të Kosovës (ASHAK), akademiken Justina Shiroka Pula.
Në takim morën pjesë nënkryetari i akademisë, akademiku Fejzullah Krasniqi, sekretari shkencor, akademiku Bardh Rugova, si dhe zëvendësministri i Arsimit dhe Shkencës, Përparim Kryeziu, që shoqëronte kryeministrin.
Sipas njoftimit të Zyrës së Kryeministrit, Shiroka Pula e uroi Kurtin për mandatin e ri qeverisës, e falënderoi për mbështetjen ndaj aktiviteteve të akademisë dhe e njoftoi për punën, planet dhe prioritetet e ASHAK-ut.
Ajo shprehu gatishmërinë e akademisë për bashkëpunim me institucionet shtetërore në nevojat dhe interesat e vendit, përmes ekspertizës profesionale që ofron.
Nga ana e tij, Kurti e uroi Shiroka Pulën për detyrën e re dhe i dëshiroi suksese. Ai nënvizoi prioritetet e qeverisë, si arsimin dhe drejtësinë, si dhe rëndësinë e tyre për zhvillimin e vendit, duke theksuar rolin e bashkëpunimit me ASHAK-un.
Palët diskutuan për zhvillimet, progresin dhe sfidat në vend, si dhe u pajtuan të mbajnë komunikim të rregullt për thellimin e bashkëpunimit ndërinstitucional.
Përditësime
Justina Shiroka Pula identifikohet si ish-ministre e PDK-së.