Shehbaz Sharif, kryeministri i Pakistanit, i ka bërë thirrje presidentit të SHBA-së, Donald Trump, të zgjasë me dy javë afatin e vendosur të së martës për Iranin. Kjo erdhi në një postim në rrjetin X, ku Sharif thekson se përpjekjet diplomatike po përparojnë në mënyrë të qëndrueshme dhe kanë potencial për rezultate thelbësore në të ardhmen e afërt.
Ai shkruan se, për të lejuar diplomacinë të vazhdojë, i kërkon me ngulm Trumpit të shtyjë afatin. Pakistani, me sinqeritet, u kërkon "vëllezërve iranianë" të hapin Ngushticën e Hormuzit për dy javë si gjest vullneti të mirë.
Kryeministri pakistanez nxit të gjitha palët ndërluftuese të respektojnë një armëpushim për dy javë, në mënyrë që diplomacia të arrijë zgjidhjen përfundimtare të luftës. Kjo, sipas tij, shërben për paqen dhe stabilitetin afatgjatë në rajon.
Trumpi ka dhënë Iranit afat deri në orën 02:00 të mërkurës me kohë të Kosovës për të hapur Ngushticën e Hormuzit, ndryshe "një qytetërim i tërë do të vdesë". Pakistani ka vepruar si ndërmjetës në këtë konflikt.