Kryeministri Edi Rama ka dhënë një intervistë për rrjetin britanik BBC, ku është ndalur te zhvillimet politike dhe protestat qytetare në Shqipëri. Sipas medias ndërkombëtare, protestat që nisën fillimisht për çështje mjedisore, janë zgjeruar duke përfshirë pakënaqësi për sistemin arsimor, shëndetësinë, pagat dhe koston e jetesës.
Lidhur me kërkesat e qytetarëve për dorëheqjen e tij dhe ngritjen e një qeverie teknike, Rama u shpreh se këto tubime janë shenjë e një shoqërie të shëndetshme dhe demokratike. Fokusin e bisedës e zuri reforma në drejtësi, të cilën kreu i qeverisë e cilësoi si kontributin kryesor të Partisë Socialiste.
“Dua një drejtësi që nuk sheh as majtas, as djathtas, por vetëm drejt. Një drejtësi që nuk mund të blihet, nuk mund t’i ushtrohet presion dhe nuk mund të kontrollohet nga larg”, deklaroi kryeministri. Ai shtoi se qeveria do të vazhdojë angazhimin e saj, duke e përshkruar procesin si një sakrificë të thellë për të ardhmen e vendit, ku partia “do t’i japë lëkurën e vet vendit”.
Artikulli i BBC gjithashtu analizon zhvillimet në Shqipëri gjatë 13 viteve të fundit, duke vlerësuar transformimin urban të Tiranës, rritjen e turizmit dhe përparimin e vendit drejt integrimit në Bashkimin Europian.