Këtë të enjte, kryeministri Edi Rama mblodhi Këshillin e Ministrave në një takim që zgjati më shumë se një orë. Ky takim pason aktivitetet e zhvilluara së fundmi në Pogradec, ku u vu theksi te qasja e re e qeverisë dhe e Partisë Socialiste ndaj shqetësimeve qytetare.
Në këto takime u prezantua platforma digjitale “Pasqyrë Albania”, e cila synon trajtimin e ankesave të qytetarëve brenda një afati prej dy javësh. Platforma do të funksionojë përmes dy mekanizmave kryesorë:
• “Flamingo Albania”: për grumbullimin e ankesave dhe shqetësimeve.
• “Radar”: për gjurmimin e rrugës së trajtimit të këtyre kërkesave nga institucionet përkatëse, si ministritë dhe bashkitë.
Ditën e premte, kryesocialisti Rama pritet të zhvillojë një takim në selinë e Partisë Socialiste me ministrat dhe drejtuesit politikë të qarqeve. Gjatë këtij takimi, i cili sipas burimeve pritet të nisë në orën 17:30, ai pritet të japë udhëzime konkrete për strukturat në zonat elektorale, për të shpjeguar dokumentet strategjike të mazhorancës, të njohura si “Besa” dhe “Prania Besnike”. Këto aktivitete shënojnë nisjen e punës përgatitore për zgjedhjet lokale të vitit 2027, ndërkohë që në javën e parë të shtatorit pritet edhe mbledhja e Asamblesë së PS.
Përditësime
Kryeministri Edi Rama nisi mbledhjen e Këshillit të Ministrave në orën 10:00. Në këtë takim, ai kërkoi nga ministrat monitorim të detajuar mujor të punës së të gjitha drejtorive. Njëkohësisht, u konfirmua se takimi në selinë e Partisë Socialiste me ministrat dhe drejtuesit politikë do të zhvillohet ditën e premte, 28 gusht.