Kryeministri Rama mbledh qeverinë në Pogradec për raportime

Kryeministri Edi Rama do të vijojë traditën e takimeve informale të qeverisë, të njohura si "retreat", përpara fillimit të sesionit të ri parlamentar. Ky takim është planifikuar të zhvillohet në qytetin e Pogradecit më 24 dhe 25 gusht, ku të gjithë ministrat do të raportojnë për punën e deritanishme dhe objektivat e secilit dikaster për muajt në vijim.

Sipas burimeve, takimi vjen në një periudhë intensive për ekzekutivin, pasi kryeministri ka kërkuar llogari të shtuar përmes dokumentit të prezantuar si "Besa", i cili përfaqëson metodën e re të punës për mandatin e katërt qeverisës. Pas këtij takimi, vëmendja zhvendoset te Partia Socialiste, ku pritet të mblidhet Asambleja Kombëtare në fillim të shtatorit, përpara seancës së parlamentit të planifikuar për datën 7 shtator.

Në qarqet politike prej disa javësh qarkullojnë zëra për një rifreskim të kabinetit qeveritar, ku flitet për mundësinë e ndryshimeve në të paktën 6 ministri. Gjithashtu, janë përfolur dorëheqjet e mundshme të ministrit të Brendshëm, Besfort Lamallari, dhe ministres së Shëndetësisë, Evis Sala. Megjithatë, çdo vendim lidhur me strukturën e qeverisë mbetet në dorën e kryeministrit Edi Rama, i cili zakonisht e ruan elementin surprizë në vendimet e tij.

Nëse mbledhja e Asamblesë Kombëtare konfirmohet, në rendin e ditës pritet të përfshihet edhe mocioni për hapjen e dialogut kombëtar mbi marrëveshjen e re për Shqipërinë, i depozituar në Partinë Socialiste nga deputetja Elisa Spiropali.