Kryeministri Edi Rama priti këtë 1 shtator në zyrën e tij kampionin shqiptar të peshave të rënda, Nelson Hysa, pas mbrojtjes së suksesshme të titullit WBO. Boksieri triumfoi ndaj norvegjezit Thomas Narmo në Londër, duke siguruar fitoren brenda dy raundeve. Ky sukses e çon rekordin e boksierit në 25 fitore pa asnjë humbje, ndërsa ai renditet ndër katër federatat kryesore ndërkombëtare të boksit.
Gjatë bisedës, Nelson Hysa theksoi vështirësitë e kësaj përballjeje, duke u shprehur se u rikthye në ring pas një pauze prej 11 muajsh dhe se përballë kishte një kundërshtar më të gjatë dhe më të rëndë, i cili konsiderohej favorit. Nga ana e tij, Kryeministri Rama e përgëzoi boksierin për rezultatet e arritura në arenën ndërkombëtare dhe e cilësoi atë si "Albanian Eagle".
Takimi u shoqërua edhe me momente humoristike. Në një bashkëbisedim me trajnerin Zef Gjoni, kryeministri Rama u shpreh me batuta në lidhje me dëmtimin e hundës së tij, duke ia atribuuar atë demokratëve. Hysa i dhuroi kryeministrit një set dorezash boksi si shenjë respekti për këtë pritje. Përmes rrjeteve sociale, kreu i qeverisë ndau pamjet e takimit, duke theksuar synimin e përbashkët për fitore në disiplinat përkatëse.