Kryeministri Edi Rama priti sot në ambientet e Kryeministrisë artistin amerikan Kanye West, i cili pritet të mbajë një koncert mbrëmjen e sotme në "Eagle Stadium", një stadium i përkohshëm i ndërtuar për këtë aktivitet përgjatë aksit rrugor Tiranë–Durrës. Gjatë takimit, ku ishte i pranishëm edhe ministri i Turizmit dhe Kulturës, Blendi Gonxhja, kryeministri i prezantoi artistit mjediset e institucionit dhe koleksionet e pikturave.
Kryeministri i dhuroi reperit librin "The Albanian Files", një botim i redaktuar nga Anneke Abhelakh, i cili dokumenton projektet e 60 studiove të huaja të arkitekturës në Shqipëri. Ky libër është bërë kohët e fundit objekt debati, pasi një grup protestuesish e kanë dorëzuar atë në SPAK duke e kontestuar, ndërsa kryeministri Rama e ka cilësuar si një projekt editorial të pavarur.
Në rrjetet sociale, Rama ndau pamje nga takimi duke e shoqëruar postimin me një vlerësim prej "pesë yjesh". Ky gjest po interpretohet si një kundërpërgjigje ironike ndaj nismave të fundit online nga organizatorë protestash, të cilët kanë synuar uljen e vlerësimit të bizneseve në platformat dixhitale.
Përditësime
Mbi 80 kombësi ishin të pranishme në koncertin e reperit amerikan Kanye West, i cili nisi në orën 21:15. Performanca u shoqërua nga një skenografi në formë globi dhe efekte vizuale të avancuara. Për menaxhimin e fluksit, Policia e Tiranës vendosi kufizime të përkohshme të qarkullimit në autostradën Tiranë-Durrës.