Kryeministri Edi Rama zhvilloi këtë të hënë një vizitë në qytetin e Shkodrës, në kuadër të aktiviteteve për 35-vjetorin e themelimit të Partisë Socialiste. Vizita e tij u shoqërua nga protesta të organizuara nga qytetarë dhe përfaqësues të shoqërisë civile, të cilët u pozicionuan në hyrje të qytetit, pranë Kalasë së Rozafës, ku ishte planifikuar mbajtja e takimit me anëtarët e kësaj force politike.
Kjo protestë shënon ditën e tretë të qëndresës qytetare në Shkodër. Ndryshe nga dy ditët e mëparshme, kur tubimet u përqendruan përpara godinës së Bashkisë dhe në qendër të qytetit, këtë herë protestuesit u zhvendosën pranë zonës ku po zhvillohej aktiviteti kryeministror. Pjesëmarrësit mbanin pankarta me mesazhe kundër politikave qeveritare dhe investimeve në Zvërnec, ndërsa në disa prej tyre shfaqeshin parullat "Rama në burg" dhe "Beneti në burg".
Për të garantuar mbarëvajtjen e vizitës, autoritetet kanë angazhuar forca të shumta policore, përfshirë FNSH-në dhe repartin Shqiponja, të cilët kanë mbajtur nën monitorim zonën përreth kalasë. Sipas raportimeve, tubimi është zhvilluar në mënyrë paqësore, pa u shënuar incidente.
Përditësime
Gjatë vizitës në Shkodër, Kryeministri Edi Rama u përball me protesta të qytetarëve kundër projektit për ndërtimin e një resorti në zonën e Rrjollit. Eskorta e tij kaloi përmes turmës nën zhurmën e sirenave, ndërsa protestuesit shprehën hapur kundërshtinë e tyre ndaj ndërhyrjes zhvillimore.