Kryeministri Edi Rama është nisur këtë të mërkurë drejt Uashingtonit për të marrë pjesë në mbledhjen e parë konstituuese të Bordit të Paqes. Kjo mbledhje, e thirrur nga Presidenti i SHBA-së Donald Trump, do të zhvillohet më 19 shkurt.
Sfida kryesore e bordit është rindërtimi i Rripit të Gazës, një proces që pritet të kërkojë angazhimin e shumë shteteve anëtare për një zgjidhje të qëndrueshme.
Ministrja për Punët e Jashtme, Elisa Spiropali, ka deklaruar se Shqipëria, si vend anëtar themelues, nuk ka detyrime financiare në këtë fazë, por do të ketë angazhime sipas statutit të organizatës. Ajo shpjegoi se bordi nuk synon të zëvendësojë organizata si OKB-ja, por shërben si instrument komplementar për të kontribuar në paqen dhe stabilizimin e situatës në Gaza.
Sipas Spiropalisë, Shqipëria është e angazhuar në procesin ndërkombëtar të stabilizimit në Gaza dhe ky angazhim do të prezantohet nga Presidenti Trump, i cili do të shpallë listën e vendeve të angazhuara. "Në këtë fazë, Shqipëria nuk ka angazhime financiare të tjera, por do të diskutojmë më vonë me partnerët tanë dhe anëtarët e tjerë të bordit për detyrimet tona", tha ajo.
Spiropali theksoi se synimi i bordit nuk është një projekt alternativ për Bashkimin Evropian, që mbetet prioritet madhor, por një mjet ku Shqipëria mund të japë kontributin e vet.
Përditësime
Shqipëria formalizon sot në Uashington marrëveshjen për t'u bërë anëtare themeluese të Bordit të Paqes.
- 19 shtete, përfshirë Kosovën, e firmosën marrëveshjen në Davos më 22 janar.
- Kryeministri Edi Rama nuk mori pjesë në Davos pasi priti Ivanka Trump-in në Vlorë.
- Ministrja Elisa Spiropali iu përgjigj pyetjeve të gazetarisë Danjela Maloku të Report TV.