Kryeministri i Shqipërisë, Edi Rama, po zhvillon një vizitë zyrtare në landin e Renanisë Veriore-Vestfalisë (Nordrhein-Westfalen – NRW), në Gjermani. Në kuadër të kësaj vizite, kreu i qeverisë zhvilloi një takim me kryeministrin e landit, Hendrik Wüst, në Düsseldorf dhe Bochum.
Diskutimet u përqendruan në forcimin e marrëdhënieve ekonomike dhe industriale mes Shqipërisë dhe këtij rajoni gjerman. Palët vlerësuan mundësitë për zgjerimin e partneritetit në sektorë strategjikë, si:
• Investimet e huaja;
• Zhvillimi i teknologjisë digjitale;
• Arsimi profesional;
• Mbështetja për procesin e anëtarësimit të Shqipërisë në Bashkimin Europian.
Vizita përfshin pjesëmarrjen e kryeministrit Rama në Ruhr Summit, një ndër ngjarjet kryesore në Europë kushtuar inovacionit, sipërmarrjes dhe teknologjisë. Në këtë samit, kryeministri do të mbajë një fjalë në panelin kryesor me temë “IA, Fuqia dhe Progresi: Rishikimi i Lidershipit për një Epokë të Re”, ku do të trajtohet ndikimi i inteligjencës artificiale në modelet e qeverisjes dhe ekonomisë.
Sipas agjendës, Rama do të jetë pjesë edhe e diskutimit “IA mes Inovacionit, Rregullimit dhe Përgjegjësisë”, ku do të shkëmbejë pikëpamje me përfaqësues të sektorit të teknologjisë, biznesit dhe konsulencës ndërkombëtare mbi sfidat etike dhe rregullatore të epokës digjitale.
Përditësime
Gjatë vizitës zyrtare në landin Nordrhein-Westfalen, Kryeministri Edi Rama ndau një video nga Ruhr Summit, ku një robot i pajisur me inteligjencë artificiale shfaqet duke bërë simbolin e shqiponjës. Ky moment ilustron avancimin teknologjik në një prej eventeve kryesore të inovacionit në Gjermani.