Kryeprokurori i Shtetit ka kërkuar nga Kryeprokurorja e Prokurorisë Themelore në Pejë, Lumturije Vucetaj, një raport me shkrim mbi kronologjinë e veprimeve të ndërmarra në rastin e vrasjes së trefishtë në fshatin Gllogjan. Kërkesa vjen pas aktgjykimit lirues të shpallur nga trupi gjykues i kryesuar nga Leon Përlaska, me anëtarë Shaqë Curri dhe Arben Mustafaj, lidhur me ngjarjen e datës 26 nëntor 2021.
Në atë ngjarje, një autobus që transportonte nxënës u sulmua me armë zjarri, sulm nga i cili mbetën të vrarë shoferi Gani Gjokaj dhe dy nxënës 17-vjeçarë, të identifikuar si L.H. dhe G.M. Prokuroria kishte ngritur akuzën se motivi i vrasjes ishte hakmarrja për vetëvrasjen e vajzës së Halil Mehmetajt në vitin 2020.
Procesi gjyqësor ishte rihapur në korrik të vitit 2026 pas prezantimit të një video-incizimi të ri, i cili shfaqte të akuzuarin Kreshnik Mehmetaj duke gjuajtur me armë në bjeshkë. Gjykata vlerësoi se provat e paraqitura nuk ishin administruar siç duhet gjatë fazave të mëparshme. Pas shpalljes së vendimit, trupi gjykues ndërpreu masën e paraburgimit për tre të akuzuarit. Përveç lirimit nga akuza për vrasje dhe shtytje në vrasje, gjykata vendosi që shpenzimet procedurale për pjesën liruese të bien në barrë të gjykatës, ndërsa të dëmtuarit u udhëzuan të ndjekin kontestet e tyre në rrugë juridiko-civile.