Ish-gjyqtari i Gjykatës Kushtetuese, Kadri Kryeziu, ka kritikuar mënyrën e komunikimit politik ndërmjet partive në Kosovë, në kohën kur vendi po përballet me krizë për zgjedhjen e presidentit.
Në emisionin FIVE të TV Dukagjini, Kryeziu vlerësoi se komunikimi ndërinstitucional dhe politik ka qenë në një nivel shumë të ulët. “Komunikimi nuk ka qenë në nivelin e vetëdijes shtetërore dhe kombëtare, institucionale. Komunikimi ka qenë i nivelit më të ulët”, deklaroi ai.
Duke komentuar dështimin për të arritur marrëveshje për presidentin, Kryeziu theksoi se përgjegjësia kryesore bie mbi palën më të fuqishme politike, pra Vetëvendosjen e kryeministrit Albin Kurti. “Në parim fajin gjithmonë e ka ai që është më i fuqishëm në parlament, më i fuqishëm me deputet dhe me votë. Përgjegjësia kryesore është e kryeministrit (Albin Kurti) dhe e Vetëvendosjes. Ata është dashur të lëshojnë pe”, shtoi ai.
Kryeziu argumentoi se lëshimi i pe-së duhej bërë ndaj shqiptarëve, jo ndaj armikut, dhe se duhej biseduar me subjektet politike. Mënyra e ftuarit për takime ka lënë për të dëshiruar, pasi çdo takim ka shërbyer për t’u mosmarrëveshur.
Përpjekjet për arritjen e një marrëveshjeje për zgjedhjen e presidentit kanë dështuar deri tani. Afati kushtetues po afrohet, çka rrit mundësinë e zgjedhjeve të reja nëse nuk arrihet një zgjidhje politike.