Ksamili është shpallur destinacioni bregdetar më i mirë në Evropë nga media amerikane e udhëtimeve “Travel Off Path”. Në një shkrim të autorit Trevor Kucheran, zona vlerësohet për ujërat e kristalta, peizazhet me gurë të bardhë dhe mundësitë e favorshme ekonomike për pushuesit.
Sipas këtij artikulli, Ksamili ofron një përvojë të krahasueshme me Maldivet, por me kosto më të ulët. Vizitorët mund të gjejnë ushqime deti për më pak se 15 dollarë, ndërsa çmimet e akomodimit janë raportuar më konkurruese se ato në destinacione të ngjashme në Greqi. Megjithatë, raportimi thekson se piku i sezonit veror shoqërohet me turma të mëdha njerëzish dhe çmime më të larta.
Ekspertët e “Travel Off Path” sugjerojnë muajt shtator dhe tetor si periudha optimale për të vizituar këtë destinacion, për shkak të temperaturave të favorshme dhe qetësisë më të madhe. Për udhëtarët që zgjedhin tragetin nga Korfuzi drejt Sarandës, artikulli këshillon llogaritjen e vonesave të mundshme në kontrollet kufitare dhe ndryshimin e orës mes dy vendeve.
Lista e pesë destinacioneve më të mira bregdetare në Evropë sipas këtij vlerësimi përfshin:
• Ksamil, Shqipëri
• Ischia, Itali – Plazhi i Marontit
• Plazhi i Adragas, Portugali
• Gjiri i Ramlas, Gozo – Maltë
• Plazhi i Sarakinikos, Milos – Greqi