Pas monitorimit në terren të protestës së zhvilluar më 2 korrik 2026 para Kuvendit të Shqipërisë, Komiteti Shqiptar i Helsinkit (KShH) ka shprehur shqetësimin mbi përshkallëzimin e situatës dhe përdorimin e forcës joproporcionale nga ana e Policisë së Shtetit.
Sipas raportit të KShH, protesta pati një karakter kryesisht paqësor për një kohë të gjatë. Megjithatë, pas një incidenti me automjetet që tentuan të dilnin nga ambientet e Kuvendit, sjellja e forcave të policisë ndryshoi menjëherë. Organizata thekson se aktet e dhunshme të kryera nga individë të veçantë nuk mund t’u atribuohen automatikisht të gjithë pjesëmarrësve, duke cituar standardet e Gjykatës Evropiane të të Drejtave të Njeriut.
Kritikat ndaj ndërhyrjes së Policisë
KShH ka evidentuar një sërë problematikash në veprimet e uniformave blu:
- Përdorimi i mjeteve të dhunës fizike, si shkopinj gome dhe grushta.
- Shtrirja në tokë e protestuesve gjatë rrethimit.
- Përdorimi i gazit lotsjellës pa një paralajmërim publik me qendër zëri dhe pa dhënë kohë të arsyeshme për shpërndarje vullnetare.
Organizata rithekson se e drejta për tubim paqësor është e garantuar nga neni 47 i Kushtetutës së Shqipërisë dhe neni 11 i Konventës Evropiane të të Drejtave të Njeriut. Në këtë kuadër, KShH kërkon hetimin e pretendimeve për tejkalim të kompetencave, duke vënë në dukje se detyrimi i shtetit është të garantojë sigurinë e qytetarëve gjatë ushtrimit të këtyre të drejtave.
Përditësime
Komiteti Shqiptar i Helsinkit (KShH) i është drejtuar zyrtarisht Prokurorisë dhe Agjencisë së Mbikëqyrjes Policore (AMP) për të hetuar përdorimin e forcës joproporcionale gjatë protestës së fundit para Kuvendit. KShH denoncoi rastet e dhunës ndaj personave të neutralizuar dhe u bëri thirrje aktorëve politikë të shmangin retorikën stigmatizuese ndaj protestuesve. Argumentimi ligjor i organizatës bazohet në jurisprudencën e Gjykatës Europiane të të Drejtave të Njeriut (GJEDNJ), duke iu referuar çështjeve Kudrevičius kundër Lituanisë, Ziliberberg kundër Moldavisë dhe Frumkin kundër Rusisë.