Kujtim Hajdaj, anëtar i kryesisë qendrore të Partisë GUXO dhe koordinator i saj jashtë Kosovës, ka njoftuar pezullimin e aktivitetit të tij politik brenda kësaj partie për një kohë të pacaktuar.
Vendimin e ka bërë të ditur përmes një postimi në Facebook, duke e lidhur atë me mbështetjen e tij publike për Vjosa Osmani si presidente, si dhe me disa rrethana të tjera në raport me udhëheqjen e partisë, të cilat nuk i ka komentuar.
"Duke qenë se unë kam dalë publikisht në mbështetje të Vjosa Osmani për Presidente, dhe duke u bazuar në disa rrethana tjera që m’u janë krijuar në raport me udhëheqjen e Partisë GUXO, që nuk dua t’i komentoj këtu, kam marrë vendim – për një kohë të pacaktuar – që të pushoj aktivitetin tim politik në kuadër të Partisë GUXO, si anëtar i kryesisë qendrore dhe si koordinator i saj jashtë Kosovës", ka shkruar Hajdaj.
Ai ka falënderuar bashkëpunëtorët për rrugëtimin politik të nisur me Listën "Vjosa", duke theksuar se ka bashkëpunuar me njerëz të mirë, patriotë që duan popullin dhe Republikën e Kosovës.
Në fund, Hajdaj ka nënvizuar se Kosova mbetet mbi çdo interes personal dhe politik, si gjak dhe sakrificë e dëshmorëve për liri, pavarësi dhe demokraci.
Ky pezullim vjen pas dorëheqjes së Haxhi Avdylit nga e njëjta parti, duke treguar lëvizje të brendshme në Partinë GUXO në këtë periudhë.