Agron Kuka, kryetar i Federatës së Xhudos së Kosovës, në një intervistë për KosovaPress, e quan mbajtjen e Lojërave Mesdhetare në Kosovë në vitin 2030 një ngjarje me përmasa historike. Kjo ngjarje tejkalon kufijtë sportive për t’u shndërruar në platformë diplomatike dhe politike për afirmimin ndërkombëtar të shtetit të Kosovës.
Lojërat Mesdhetare kanë traditë mbi 50 vjeçare dhe zhvillohen çdo katër vjet. Në sportin e xhudos, ato konsiderohen ndër garat më prestigjioze në kalendarin ndërkombëtar.
Në xhudo marrin pjesë shtete me traditë të fortë si Franca, Italia, Spanja, Portugalia, Turqia, Maroku, Algjeria dhe Egjipti. Këto vende e kanë zhvilluar xhudon si prioritet, duke e bërë konkurrencën jashtëzakonisht të lartë.
Pjesëmarrja e Kosovës në këtë nivel dëshmon zhvillimin e sportit vendor. Si shtet i ri, Kosova e sheh këtë garë si mundësi për të konkurruar me fuqi botërore.
Në aspektin diplomatik, pritet pjesëmarrja e rreth 24 nga 26 shteteve anëtare, mes tyre vende që ende nuk e kanë njohur pavarësinë e Kosovës.