Kryeministri i Kosovës, Albin Kurti, zhvilloi një takim me homologun e tij nga Maqedonia e Veriut, Hristijan Mickoski, në margjinat e Javës së Nivelit të Lartë të Sesionit të 81-të të Asamblesë së Përgjithshme të Kombeve të Bashkuara në New York. Ky takim pason bashkëpunimin e mëparshëm të dy kryeministrave, të cilët katër javë më parë morën pjesë së bashku në nisjen e punimeve për autostradën Shkup-Bllacë.
Në qendër të bisedimeve ishte avancimi i projekteve të përbashkëta infrastrukturore dhe energjetike. Albin Kurti theksoi rëndësinë e përshpejtimit të procedurave për ndërtimin e tunelit Prizren-Tetovë, duke e cilësuar këtë si një projekt kyç për qytetarët, zhvillimin e turizmit dhe ekonomitë e të dyja vendeve. Përveç infrastrukturës rrugore, liderët diskutuan edhe mbi zbatimin e marrëveshjes për thëngjillin, një hap i rëndësishëm për sigurimin e qëndrueshmërisë energjetike të rajonit.
Kryeministri Kurti vlerësoi marrëdhëniet ndërmjet dy shteteve, duke i cilësuar Kosovën dhe Maqedoninë e Veriut si fqinje, mike dhe partnere. Në përfundim të takimit, të dyja palët u pajtuan të vazhdojnë punën për realizimin e këtyre projekteve me qëllim forcimin e paqes, sigurisë dhe integrimit euroatlantik në rajon.