Kryeministri i Kosovës, Albin Kurti, ka emëruar Jeton Zulfajn kryenegociator të Kosovës me Bashkimin Evropian.
Zulfaj do të koordinojë procesin e integrimit evropian të Kosovës, i mbështetur nga strukturat shtetërore përkatëse. Ai ka shërbyer si këshilltar politik i Kurtit që nga marsi i vitit 2021. Me këtë emërim, Zulfaj zëvendëson kryenegociatorin e deritanishëm, Besnik Bislimin.
Bislimi ka udhëhequr negociatat e Kosovës me Serbinë, të ndërmjetësuara nga BE në Bruksel. Në shkurt të këtij viti, Qeveria bëri të ditur se në procesin e dialogut me Serbinë, Kosova do të përfaqësohet nga Glauk Konjufca, ministër i Punëve të Jashtme dhe Diasporës.
Përveç rolit si kryenegociator me BE-në, Zulfaj do të jetë edhe koordinator kombëtar për Instrumentin për Reforma dhe Rritje (RGF). Ai do të shërbejë si autoriteti kryesor koordinues në emër të Qeverisë për të gjitha çështjet e lidhura me këtë instrument.
Konteksti i integrimit evropian
Kosova mbetet i vetmi vend në Ballkanin Perëndimor pa status kandidati për anëtarësim në Bashkimin Evropian. Kërkesa për anëtarësim u dorëzua në fund të vitit 2022, por nuk është shqyrtuar ende.
Situata politike aktuale
Qeveria Kurti 3 është votuar më 11 shkurt. Megjithatë, Kosova përballet me paqartësi për shkak të ngrirjes së punës së Kuvendit. Lëvizja Vetëvendosje, parti në pushtet, e ka çuar në Gjykatën Kushtetuese dekreten e presidentes Vjosa Osmani për shpërndarjen e Kuvendit, në pamundësi për të zgjedhur presidentin e ri.
Mandati i Osmanit skadon më 4 prill. Gjykata Kushtetuese ka vendosur ngrirjen e punës së Kuvendit deri më 31 mars, derisa të qartësohet nëse dekreti i saj është shpallur në përputhje me ligjin.