Albin Kurti, kryeministri i Kosovës, ka emëruar Arlind Manxhukën në pozicionin e zëdhënësit të Qeverisë së Republikës së Kosovës. Ky vendim është marrë më 24 shkurt 2026 dhe është nënshkruar nga vetë Kurti.
Manxhuka, i cili njëkohësisht mban detyrën e këshilltarit politik në Zyrën e Kryeministrit, do të kryejë përgjegjësitë e parashikuara në Ligjin Nr. 08/L-117 për Qeverinë e Republikës së Kosovës, si dhe detyra të tjera shtesë të caktuara nga kryeministri.
Vendimi mbështetet në nenin 94 të Kushtetutës së Kosovës, nenet 9 (1.3), 13 (2 dhe 5) dhe 17 (2) të Ligjit për Qeverinë, si dhe nenin 24 (1) të Rregullores QRK Nr. 04/2026 për fushat e përgjegjësisë administrative të ministrive. Teksti i vendimit thotë: "Z. Arlind Manxhuka emërohet zëdhënës i Qeverisë, i cili njëkohësisht është këshilltar politik i kryeministrit".
Zëdhënësi i Qeverisë është i detyruar të deklarojë pasurinë sipas Ligjit Nr. 08/L-108 për deklarimin, prejardhjen dhe kontrollin e pasurisë dhe të dhuratave. Marrëdhënia e punësimit përfundon me mbarimin e mandatit të kryeministrit, nëse emërimi nuk ndërpritet më herët. Vendimi hyn në fuqi në ditën e nënshkrimit dhe dërgohet te Manxhuka, shefi i stafit të kryeministrit dhe sekretari i përgjithshëm i Zyrës së Kryeministrit.
Para këtij emërimi, Arlind Manxhuka ka shërbyer si zëdhënës i Lëvizjes Vetëvendosje, ku ka mbrojtur qëndrimet e partisë dhe të kryeministrit Kurti.
Përditësime
Përparim Kryeziu, ish-zëdhënës i Qeverisë së Kosovës, u emërua së fundmi zëvendësministër i Arsimit dhe Shkencës.