Albin Kurti fitoi zgjedhjet e 28 dhjetorit në Kosovë me mbi 51 për qind të votave, duke marrë një mandat të ri pas një periudhe tensionesh me aleatët perëndimorë.
Tensionet u ushqyen nga veprimet e qeverisë së kaluar të Kurtit, si vendosja e kryetarëve shqiptarë në komunat me shumicë serbe në veri dhe mbyllja e shumicës së institucioneve serbe. Bashkësia ndërkombëtare i cilësoi këto veprime si të njëanshme, të pakoordinuara dhe problematike për komunitetin serb.
Në kulmin e krizës, më 2023, sekretari amerikan i Shtetit Antony Blinken i dënoi ashpër ato, duke thënë se ishin kundër këshillave të SHBA-së dhe partnerëve evropianë. Ai paralajmëroi pasoja për marrëdhëniet dypalëshe mes Kosovës dhe SHBA-së. Pak ditë më vonë, Kosova u përjashtua nga stërvitjet ushtarake Defender Europe 2023, nikoqire e të cilave ishte vetë.
Për Kurtin, tani në retrospektivë, ia ka vlejtur barra qiranë, pasi strukturat paralele të Serbisë janë eliminuar dhe shteti ka shtrirë rendin dhe ligjin. Në një deklaratë për Televizionin Kanal 10 në Prishtinë, dhjetorin e kaluar, ai tha: "Ne jemi miq përkundër kritikave. Ne nuk jemi miq të vërtetë nëse nuk arrijmë ta normalizojmë kritikën për njëri-tjetrin".
Në kontrast, SHBA-ja vitin e kaluar pezulloi Dialogun Strategjik me Kosovën, një mekanizëm për thellimin e marrëdhënieve dypalëshe. Në dhjetor, një takim i Komitetit për Politikë të Jashtme të Dhomës së Përfaqësuesve e përshkroi Kurtin si pengesë në avancimin e proceseve.
Në Kosovë, perceptimi është pozitiv, me mbi 51 për qind të votave që reflektojnë mbështetjen e brendshme për liderin e Vetëvendosjes.