Kryetari i Lëvizjes Vetëvendosje!, Albin Kurti, ka folur në një tubim zgjedhor në Gjilan. Ai u bëri thirrje mbështetësve që më 7 qershor të tejkalojnë pragun e 500 mijë votave dhe të sigurojnë një fitore më të madhe.
Kurti kujtoi se më 9 shkurt të vitit të kaluar Lëvizja Vetëvendosje! kishte marrë afër 400 mijë vota në zgjedhjet qendrore. Më 28 dhjetor, sipas tij, u arritën afër 500 mijë vota. Ai tha se tejkalimi i këtij numri më 7 qershor do të krijojë institucione funksionale dhe do t’i mbyllë mundësitë bllokut opozitar për të mbajtur shtetin peng.
Kurti theksoi se qeveria po ndërton shkolla dhe çerdhe, po investon në ushtri dhe siguri, si dhe po rrit mbështetjen për fëmijët, studentët dhe familjet. Ai përmendi numrin 116 si shenjë të ditës së votimit më 7 qershor, të cilën e lidhi me progresin shoqëror, rritjen ekonomike dhe sigurinë shtetërore.